Rejep Taýyp Ärdogan Türkmenistanyň “Hormatly iş ýaşulusy” boldy
Türkmenistanyň Prezidenti Serdar Berdimuhamedow Türkiýe Respublikasynyň Prezidenti Rejep Taýyp Ärdogany şanly 70 ýaş toýy mynasybetli gutlap, oňa Türkmenistanyň “Hormatly il ýaşulusy” diýen ady dakdy. Bu barada Türkmenistanyň Döwlet habarlar agentligi mälim edýär.
“Türkmen halkynyň gadymdan gelýän hoşniýetli goňşuçylyk we ýaşuly nesle hormat goýmak däplerine eýerip, türkmen-türk gatnaşyklaryny ösdürmäge bahasyna ýetip bolmajak şahsy goşandyňyzy, halklarymyzyň jebisligine, gülläp ösmegine gönükdirilen aladaňyzy göz öňünde tutup, şeýle hem şanly 70 ýaş toýuňyz mynasybetli, jenap Rejep Taýyp Ärdogan, Size Türkmenistanyň “Hormatly il ýaşulusy” diýen adyny dakmak barada karara geldik” diýlip, hatda bellenýär.
Türkmenistanyň Prezidenti özüniň gutlagynda döwletara hyzmatdaşlygyny alyp barmakda hemişe “Bir millet — iki döwlet” diýen esasy ýörelgä esaslanylýandygyny belledi.
“Söwda-ykdysady ulgamda ýyl-ýyldan täze derejeleriň gazanylýandygyny aýtmak ýakymlydyr. Türkiýe Respublikasy Türkmenistanyň daşary söwda gatnaşyklaryny alyp barýan iň esasy ýurtlarynyň biri bolup durýar. Köp sanly türk kompaniýalary ýurdumyzda durmuşa geçirilýän ykdysady taslamalara gatnaşmak bilen, ykdysadyýetimizi diwersifikasiýa ýoly arkaly ösdürmäge we durmuş maksatly taslamalary amala aşyrmaga gatnaşýarlar” diýip, Türkmenistanyň Prezidenti Serdar Berdimuhamedow belleýär.
Türkiýe Respublikasynyň Prezidenti Rejep Taýyp Ärdogana türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow hem gutlag hatyny iberdi.
ORIENT news
