Mart aýynda Türkmenistanda syýahatçylygyň ösüşi boýunça halkara maslahat geçiriler
Mart aýynda “Türkmenistanda syýahatçylygy ösdürmegiň esasy ugurlary we mümkinçilikleri” atly halkara maslahatyny geçirmek meýilleşdirilýär. Bu barada wise-premýer Mährijemal Mämmedowa anna güni türkmen Hökümetiniň mejlisinde baharyň birinji aýynda geçirilmegi meýilleşdirilýän ynsanperwerlik ugurly çäreleriň meýilleşdirilýändigi barada beren hasabatynda aýtdy.
Şeýle hem daşary ýurtly žurnalistleriň gatnaşmagynda “Türkmen topragy - gadymy medeniýetleriň merkezi” atly metbugat konferensiýasy guralar.
Bir aýyň dowamynda Magtymguly Pyragynyň 300 ýyllygyna we Änew şäheriniň 2024-nji ýylda türki dünýäsiniň medeni paýtagty hökmünde yglan edilmegine bagyşlanan çeper we dokumental filmleriň görkezilişi meýilleşdirilýär.
Ýurtda 8-nji martda Halkara zenanlar güni we Milli bahar baýramy mynasybetli däp bolan dabaralar geçiriler. Nowruzyň gelmegi welaýatdaky “Türkmeniň ak öýi” binasynda we Arkadag şäherinde, şeýle hem esasy “bahar çemenzarlygy” bolan “Nowruz ýaýlasy” baýramçylyk meýdançalarynda köpçülikleýin çäreler bilen garşylanar.
ORIENT news
