Türkmen halkynyň Milli Lideri Magtymguly Pyraga aýratyn hormat goýulýandygy üçin özbek Liderine minnetdarlyk bildirdi
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Özbegistanda beýik türkmen şahyry we akyldary Magtymguly Pyragynyň 300 ýyllygyny giňden bellemek hakynda Kararyň kabul edilendigi üçin Özbegistanyň döwlet Baştutany Şawkat Mirziýoýewe minnetdarlyk hatyny iberdi. Bu barada Türkmenistanyň Döwlet habarlar agentligi mälim edýär.
“Siziň döredijiligi, filosofik mirasy bilen adamzadyň ruhy genji-hazynasynda hemişelik orun alan mugallym we ynsanperwer Magtymguly Pyragynyň umumydünýä edebiýatynyň hem-de medeniýetiniň taryhynda görnükli orny baradaky sözleriňiz bilen doly ylalaşýaryn. Elbetde, biz Magtymgulynyň türkmen we özbek halklarynyň doganlygynyň, dostlugynyň, ykballarynyň bitewüliginiň binýadyny döretmäge goşan uly goşandyny hemişe aýratyn minnetdarlyk we buýsanç duýgusy bilen belleýäris” diýlip, hatda bellenýär.
Gurbanguly Berdimuhamedow özüniň hatynda Prezident Şawkat Mirziýoýewe berk jan saglyk, abadançylyk, döwlet we syýasy işiňizde täze üstünlikleri, Özbegistanyň halkyna bolsa parahatçylyk, gülläp ösüş arzuw etdi.
ORIENT news
