Türkmenistanyň ilçisi Litwanyň milli baýramçylygynyň resmi çärelerine gatnaşdy
Türkmenistanyň Belarus Respublikasyndaky we şol bir wagtyň özünde Litwa Respublikasyndaky Adatdan daşary we Doly ygtyýarly ilçisi, bu ýurtda akkreditlenen diplomatik wekilhanalaryň ýolbaşçylarynyň Litwanyň Prezidenti bilen ýyllyk duşuşygyna gatnaşmak üçin Wilnýusa iş sapary bilen bardy.
Çarşenbe güni, 14-nji fewralda ilçi Nazarguly Şagulyýew Litwa Respublikasynyň Daşary işler ministriniň orunbasary Ýonas Surwil bilen duşuşdy. Olar ikitaraplaýyn söwda we ykdysady hyzmatdaşlygyň häzirki ugurlaryny, şeýle hem ýokary derejedäki duşuşyklary meýilleşdirmek we guramak ýaly möhüm temalary ara alyp maslahatlaşdylar.
Bu nukdaýnazardan, taraplar 2024-nji ýylda Türkmenistanyň we Litwa Respublikasynyň Hökümetara iş toparynyň ikinji mejlisini, şeýle hem birnäçe medeni we ynsanperwer çäreleri geçirmek mümkinçiligine garadylar.
15-nji fewralda Nazarguly Şagulyýew beýleki ýurtlaryň ilçileri bilen birlikde milli baýramçylyk - döwletiň dikeldilmeginiň 106 ýyllygy mynasybetli Litwanyň Prezidenti Gitanas Nausedanyň resmi kabul edişligine gatnaşdy.
Ertesi gün türkmen ilçisi Wilnýusyň merkezindäki Simonas Daukantas meýdanynda Baltika ýurtlarynyň üçüsiniň baýdaklaryny galdyrmak dabarasyna gatnaşdy. Prezident Gitanas Nauseda bu çärede garaşsyzlyk ýyllarynda edilen işler we döwletiň alyp barýan işleri barada çykyş etdi.
ORIENT news
