Halkara bilermenler Türkmenbaşy Halkara deňiz portunyň işgärlerine onlaýn okuwlary geçýärler
Halkara bilermenler Türkmenbaşy Halkara deňiz portunyň işgärlerine onlaýn okuwlary geçýärler. Okuwlar “Türkmen Logistika” assosiasiýasynyň, “CILT Central Asia-nyň” we “USAID TCA-nyň” bilelikdäki taslamasynyň çäklerinde guralýar. Bu barada Türkmenbaşy Halkara deňiz porty habar berýär.
12-nji marta çenli dowam etjek onlaýn okuwlaryň çäklerinde ilkinji bolup deňiz daşamalary boýunça halkara bilermen Kiril Samaraý çykyş etdi. Ol deňiz logistikasynda häzirki zaman portlarynyň işine täsirini ýetirýän ählumumy ýörelgeler, deňizdäki hereketleri dolandyrmak, şol sanda dolandyryşyň ähmiýeti we tutýan orny, onuň netijeliligini artdyrmak, ýük amallaryny we daşamalaryny utgaşdyrmak, ýük akymlarynyň işini sazlaşdyrmak, ýakyn ýyllarda deňiz logistikasyny düýpli özgerdip biljek innowasion tehnologiýalar barada bilimleri paýlaşdy.
Samaraý şeýle hem portuň işgärlerine üstünligiň we ýolbaşçylyk etmegiň strategiýalary, öwrenilen bilimleri netijeli ulanmak barada gyzykly zatlary gürrüň berdi.
ORIENT news
