Bilim işgärleriniň arasynda döredijilik bäsleşigi yglan edildi
Türkmenistanyň Bilim ministrligi, Kärdeşler arkalaşygynyň Milli merkezi “Mugallymlar gazeti” gazetiniň redaksiýasy bilen bilelikde Magtymguly Pyragynyň doglan gününiň 300 ýyllygy mynasybetli bilim ulgamynda zähmet çekýän adamlaryň arasynda “Magtymgulynyň arzuwlan zamany geldi” atly döredijilik bäsleşigini yglan edýär.
Döredijilik bäsleşigine Türkmenistanda bilim ulgamyny we bilim işini kämilleşdirmekde ýaýbaňlandyrylan özgertmeleri, Türkmenistanyň Prezidenti Serdar Berdimuhamedowyň “Ýaşlar – Watanyň daýanjy” atly kitabynyň ähmiýeti we Magtymguly Pyragynyň döredijiligini beýan edýän eserler kabul ediler.
Bäsleşikde ýeňiji diýlip yglan ediljek eserler iň gowy makala, iň gowy hekaýa, iň gowy goşgy ugurlary boýunça kesgitlener. Bäsleşige hödürlenjek eserler ozal hiç ýerde çap edilmedik bolmalydyr. Hödürlenýän eserde awtoryň şahsy maglumatlary görkezilmelidir.
Bäsleşige hödürlenen iň gowy eserler “Mugalllymlar gazeti” gazetinde çap ediler. Döredijilik bäsleşiginiň ýeňijileri Türkmenistanyň Garaşsyzlyk baýramynyň öňüsyrasynda yglan ediler. Ýeňiji bolanlara guramaçylar tarapyndan gymmat bahaly sowgatlar berler.
ORIENT news
