Türkmenistanyň Prezidentiniň kitaby Fransiýada tanyşdyryldy
Türkmenistanyň Fransiýa Respublikasyndaky ilçihanasynyň binasynda Prezident Serdar Berdimuhamedowyň "Ýaşlar - Watanyň daýanjy" atly kitabynyň tanyşdyrylyş dabarasy geçirildi. Ilçi Maksat Çaryýew ýygnananlara Türkmenistanyň Prezidentiniň ilkinji kitabynyň ähmiýeti barada gürrüň berdi. Bu barada Türkmenistanyň Fransiýa Respublikasyndaky diplomatik wekilhanasy habar berýär.
Dabara Fransiýanyň Dolandyryş boýunça ýokary mekdebinde (EMLV), Inženerleriň ýokary mekdebinde (ESILV), Sanlylaşdyrmak boýunça ýokary mekdebinde (IIM), Puatýeniň Milli inženerler mekdebinde (ENSI Poitiers), Sorbonna uniwersitetinde bilim alýan fransuz talyp ýaşlary we beýlekiler gatnaşdylar.
Türkmenistanyň diplomatik wekilhanasynyň ýolbaşçysy Türkmenistanyň we Fransiýanyň arasyndaky ikitaraplaýyn gatnaşyklar, Türkmenistanyň parahatçylyk söýüjilikli daşary syýasy ugry we ýurtda durmuşa geçirilýän özgertmeler barada gürrüň berdi.
Mundan başga-da, Magtymguly Pyragynyň doglan gününiň 300 ýyllygy mynasybetli geçiriljek milli we halkara ähmiýetli çäreler barada durlup geçildi.
ORIENT news
