Atçylyk pudagyna ýöriteleşen ýokary okuw mekdebiniň rektory Doha şäherinde konkur ýaryşynyň açylyş dabarasyna gatnaşdy

Fewral 16, 2024 | 11:30 |5289

Aba Annaýew adyndaky Halkara atçylyk akademiýasynyň rektory Pygy Baýramdurdyýew we Türkmenistanyň Katar Döwletindäki ilçisi Myratgeldi Seýitmämmedow Doha şäherinde geçirilýän “Emiriň gylyjy” atly konkur sporty boýunça 13-nji çempionatyň açylyş dabarasyna gatnaşdy. Bu barada Türkmenistanyň Katar Döwletindäki ilçihanasy habar berýär.

Üç günläp dowam edýän atçylyk sport ýaryşy Katar Döwletiniň milli sport senenamasyndaky iň möhüm wakalaryň biridir. Konkur boýunça esasy ýaryşlar Katar Atçylyk federasiýasynyň baş atçylyk toplumynda geçirilýär. Bu ýerde her gün üç ýaryş geçiriler.

Bäsleşige ozal Halkara atçylyk federasiýasynyň ülňülerine laýyklykda degişli türgenleşikleri geçen ýaş türgenleriň gatnaşjakdygy mälim edilipdi.

ORIENT news