Owganystan we Türkmenistan ykdysady hyzmatdaşlyk boýunça gepleşikleri geçirýärler
Owganystan bilen Türkmenistan maýa goýumlaryny artdyrmak, hyzmatdaşlygy ösdürmek, milli we halkara söwdany goldamak maksady bilen salgyt babatda deslapky ylalaşyk gazandy.
Owganystanyň Maliýe ministrliginiň habar bermegine görä, Türkmenistan bilen Owganystanyň degişli edaralarynyň wekiliýetleriniň arasynda ilkinji geňeşmeler Kabulda geçirildi. Iki ýurduň salgyt edaralarynyň ýokary derejeli wekilleriniň indiki duşuşygy bolsa ýakyn wagtda geçiriler.
Geçirilen gepleşikleriň goşa salgyt salynmazlyga, söwda gatnaşyklaryny giňeltmäge, maýa goýumlaryny artdyrmaga we salgyt galplyklarynyň öňüni almaga we gümrük meselelerini çözmäge gönükdirilendigi bellendi. Kabulda geçirilen ara alyp maslahatlaşmalar iki ýurduň arasyndaky ykdysady we söwda gatnaşyklaryny pugtalandyrmakda möhüm waka boldy.
Şol bir wagtyň özünde, owgan işewürligi Akina guryýer portunda Owganystan bilen Türkmenistanyň arasyndaky söwda dolanyşygynyň ýokarlanandygyny habar bermek bilen, ýerli häkimiýet bu serhet gümrük nokadynyň geçiriş mümkinçiligini giňeltmäge çagyrýar. Bu barada “TOLO” habarlar agentligi mälim edýär.
Owganystanyň Senagat we söwda ministrligi geçen ýyl Owganystan bilen Türkmenistanyň arasyndaky söwda dolanyşygynyň 481 million dollara barabar bolandygyny habar berdi. Şonuň 3 million dollary eksport, 477 million dollary bolsa import edilen önümlerdir. Türkmenistandan import edilen önümleriň agramly bölegini elektrik energiýasy we nebitgaz pudagynyň önümleri düzýär.
ORIENT news
