BMG Aždarha ýyly mynasybetli ýörite markalar toplumyny çykardy
Däp bolşy ýaly, BMG Aý senenamasy boýunça Aždarha ýylyna bagyşlanan ýörite markalar toplumyny çykardy. Bu barada Hytaýyň halkara habarlar ýaýlymy «CGTN» habar berýär.
Markalaryň dizaýny hytaýly suratkeş Taýger Pan tarapyndan döredildi.
BMG-niň poçta departamentiniň grafika we kommunikasiýalar bölüminiň başlygy Serhio Baradatyň belleýşi ýaly, markalaryň bu tapgyry örän üstünlikli boldy. Ony tapawutdyrýan zat bolsa hytaý senenamasynyň ýeke-täk mifiki jandary bolan aždarhadyr.
«Biziň markalarymyz örän möhümdir. Meniň pikirimçe, olar hatly bukjanyň burçunda ýerleşdirilýän we bütin dünýäde gezelenç edýän kiçijik ilçilerdir» diýip, Baradat belledi.
Geçen ýylyň dekabr aýynyň ahyrynda BMG-niň Baş Assambleýasynda Bahar baýramyny Birleşen Milletler Guramasynyň baýramçylyklarynyň resmi sanawyna girizmek biragyzdan goldanyldy.
ORIENT news
