Daşkent şäherinde Merkezi Aziýanyň “Ýaşyl” uniwersiteti açyldy we sebitiň howa boýunça gün tertibine garaldy
10-njy fewralda Daşkent şäherinde açylan Daşky gurşawy goramak we howanyň üýtgemegi boýunça Merkezi Aziýa uniwersitetiniň mejlisler zalynda BMG-niň Howanyň üýtgemegi baradaky Çarçuwaly konwensiýasyna gatnaşyjy taraplaryň 28-nji maslahatynyň jemlerine bagyşlanyp Merkezi Aziýa sebit mejlisi geçirildi.
Mejlise Merkezi Aziýanyň bäş ýurdundan, şol sanda Türkmenistandan, halkara guramalarynyň we diplomatik wekilhanalaryň ýolbaşçylary, ylmy jemgyýetiň wekilleri, daşky gurşawy goramak boýunça işjeň wekiller we habar beriş serişdeleriniň ýolbaşçylary gatnaşdylar.
Ýokary derejeli çäräniň birinji mejlisi “Merkezi Aziýada howa syýasatynyň emele gelmegi” mowzugyna bagyşlandy. Gepleşikleriň dowamynda çykyş edenler tejribe alyşmagy, howanyň üýtgemegine uýgunlaşmakda we onuň netijelerini azaltmakda tejribe alyşmagy, tehnologiýalary hem-de gollanmalary alyşmagy ýeňilleşdirip biljek sebit hyzmatdaşlygyny berkitmegiň möhümdigini bellediler. Özbegistanyň Ekologiýa ministrliginiň metbugat gullugynyň habar bermegine görä, howa meseleleri boýunça geçirilýän gepleşiklerde Merkezi Aziýanyň barha artýan orny bu sebitiň sesiniň halkara arenasyndaky ähmiýetini nygtaýar.
Edaranyň ýolbaşçysy kärdeşlerine Daşkentdäki “Ýaşyl” uniwersitetinde öňdebaryjy daşary ýurtly alymlaryň we hünärmenleriň gatnaşmagynda Howa boýunça ylmy forumyň guralmagynyň we beýleki çäreleriň ähmiýeti barada gürrüň berdi.
“Merkezi Aziýa sebitiniň durnukly kuwwatyny döretmekde halkara hyzmatdaşlaryň orny” atly ikinji mejlisde GIZ, USAID, ÝHHG, ICAT, Ýewropa Bileleşiginiň, Bütindünýä bankynyň, FAO-nyň, BMG-niň Ösüş maksatnamasynyň wekilleri çykyş etdiler.
“Ýaşyl” uniwersitetiň açylyş dabarasyna türkmen wekiliýeti hem gatnaşdy. Ýokary okuw mekdebiniň maksady ýerli, sebitleýin we global daşky gurşaw meselelerini netijeli dolandyrmak, ekologiýa we daşky gurşawy goramak babatynda sebitleýin hyzmatdaşlygy güýçlendirmek, ylmy we intellektual potensialy durmuşa geçirmekde innowasion pikirleri, tejribeleri we tehnologiýalary ornaşdyrmakdan ybaratdyr.
Uniwersitet jemgyýetçilik ýokary bilim edarasy bolup, onuň işi “Hub and Spoke” ýörelgesine laýyklykda guralýar. Bu model strategiki we özara peýdaly hyzmatdaşlyga, toplumlaýyn bilim ulgamyny döretmäge, çeşmeleri optimizirlemäge, okuwçylaryň we hünärmenleriň hereketine esaslanýar, şeýle hem ýerli hünärmenleriň potensialyny ýokarlandyrmaga, bilim we tejribe alyşmaga ýardam edýär. Okuw sapaklary özbek, rus we iňlis dillerinde leksiýalar, laboratoriýa we aýry-aýry sapaklar, tankydy pikirleniş, meseleler we synaglar esasynda toparlarda amaly iş arkaly kredit-modul ulgamyny ulanyp geçirilýär.
Häzirki wagtda Angliýanyň, Täze Zelandiýanyň, ABŞ-nyň we beýleki ýurtlaryň halkara uniwersitetleriniň dürli mugallymlary bu ýokary okuw mekdebi bilen hyzmatdaşlyga işjeň gatnaşýarlar.
ORIENT news
