Prezident Serdar Berdimuhamedow pagtanyň we bugdaýyň döwlet satyn alyş nyrhlaryny tassyklady
Türkmenistanyň Prezidenti Serdar Berdimuhamedow ýetişdirilen pagta we bugdaý hasylynyň 2024-nji ýylda döwlet satyn alyş bahalarynyň möçberleri barada Karara gol çekdi. Degişli resminama türkmen metbugatynda çap edildi.
Şeýlelikde, bugdaýyň bir tonnasynyň döwlet satyn alyş bahasy 2 müň manat möçberde;
nah pagtanyň bir tonnasy üçin döwlet satyn alyş bahalary ýygymyň başlanýan gününden 15-nji oktýabra çenli 5 müň manat, 15-nji oktýabrdan 15-nji noýabra çenli 4 müň 770 manat, 15-nji noýabrdan ýygymyň tamamlanýan gününe çenli 4 müň 550 manat möçberde;
ýüpek pagtanyň bir tonnasy üçin döwlet satyn alyş bahalary ýygymyň başlanýan gününden 15-nji oktýabra çenli 6 müň 700 manat, 15-nji oktýabrdan 15-nji noýabra çenli 6 müň 400 manat, 15-nji noýabrdan ýygymyň tamamlanýan gününe çenli 6 müň 100 manat möçberde bellenildi.
Degişli Karar “Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasynda” bellenen wezipeleri üstünlikli durmuşa geçirmek, ýurdumyzda bugdaýyň we gowaçanyň bol hasylyny ösdürip ýetişdirmek, daýhanlaryň ýere bolan höwesini artdyryp, yhlasly zähmet çekmekleri üçin, oba hojalyk önümlerini öndürijileri ykdysady taýdan höweslendirmek maksady bilen kabul edildi.
ORIENT news
