2024-nji ýylda Türkmenistanda 3 million düýp bag nahaly oturdylar
Prezident Serdar Berdimuhamedow Türkmenistanda 2024-nji ýylda saýaly, pürli, miweli baglaryň we üzümiň 3 million düýbüni ekmek hakynda Karara gol çekdi. Umumy oturdyljak bag nahallarynyň 1,5 million düýbi Aşgabat we Arkadag şäherleriniň eteklerinde, ýene 1,5 million düýbi hem welaýatlarda oturdylar.
Ministrlikler, pudaklaýyn dolandyryş edaralary, welaýatlaryň, Aşgabat we Arkadag şäherleriniň häkimlikleri miweli baglaryň hem-de üzüm nahallarynyň aýratyn kesgitlenen ýer böleklerinde görnüşleri boýunça ekilmegini, ekilen saýaly, pürli, miweli bag we üzüm nahallarynyň damjalaýyn usulda suwarylmagyny üpjün etmäge borçly edildi.
Degişli Karara Ministrler Kabinetiniň 2023-nji ýylyň jemlerine bagyşlanyp anna güni geçirilen giňişleýin mejlisiniň dowamynda gol çekildi.
ORIENT news
