Türkmen diplomatlary Ženewa şäherinde zenanlaryň hukuklary baradaky Konwensiýanyň durmuşa geçirilişini maslahatlaşýarlar
Türkmenistanyň wekiliýeti Şweýsariýanyň Ženewa şäherinde geçirilýän Birleşen Milletler Guramasynyň Zenanlara garşy kemsitmeleriň ähli görnüşlerini ýok etmek baradaky we olaryň hukuklaryny goramaga gönükdirilen Konwensiýasyny ýerine ýetirmek boýunça komitetiň (CEDAW) nobatdaky mejlisiniň işine gatnaşýar. Bu barada Türkmenistanyň Döwlet habarlar agentligi mälim edýär.
Mejlisiň barşynda Türkmenistanyň BMG-niň degişli Konwensiýasyny ýerine ýetirmek bilen bagly altynjy döwürleýin hasabatyna garaldy. Türkmen wekiliýetiniň agzalary öz çykyşlarynda 2018-nji ýylda geçirilen 5-nji döwürleýin synyň çäklerinde bellenilen birnäçe meseleleri çözmekde öňegidişlikleri gazanmaga mümkinçilik beren, 2018 — 2023-nji ýyllar aralygynda syýasy, ykdysady, hukuk, medeni-durmuş ugurlarynda amala aşyrylan özgertmeler barada maglumat berdiler.
Häzirki wagtda Türkmenistanda zenanlaryň hukuklaryny goraýan berk jemgyýetçilik birleşikleri hereket edýär. Şolaryň hatarynda Türkmenistanyň Zenanlar birleşigine aýratyn orun degişlidir.
ORIENT news
