Türkmen hünärmenleri fransuz klassifikasiýa jemgyýetiniň şahadatnamalaryny aldylar
Türkmenistanda gämi gatnawyna döwlet gözegçilik administrasiýanyň hünärmenleri Gazagystan Respublikasynyň Aktau şäherinde Fransiýa Respublikasynyň «Bureau Veritas Marine & Offshore sas» klassifikasion jemgyýeti (BV klassifikasion jemgyýeti) tarapyndan guralan «Ulanyşdaky gämileri barlamak» ugry boýunça okuwa gatnaşdylar.
Okuwyň dowamynda BV klassifikasion jemgyýetiniň bilermenleri tarapyndan halkara standartlaryna laýyklykda gämileriň howpsuz ýüzüşini üpjün etmegi we daşky gurşawyň hapalanmagynyň öňüni almagy üpjün etmegiň esasy talaplary boýunça sapaklar berildi. Hususan-da, Klassifikasion Jemgyýetleriň Halkara Assosiýasy (IACS) barada düşünje berlip, klassifikasion jemgyýetleriň alyp barýan işleri, konsepsiýasy hem-de olaryň ähmiýeti barada öwrenildi. Bu barada “Türkmendeňizderýaýollary” agentligi habar berýär.
Şeýle-de, döwlet port gözegçiligi barada hem durlup geçilip, onuň esasy wezipeleri we gämi gatnawynyň howpsuzlygyny üpjün etmekdäki ähmiýeti barada giňişleýin diňlenildi. Geçirilen okuwyň netijesinde hünärmenlere «Ulanyşdaky gämileri barlamak» ugry boýunça şahadatnamalar gowşuryldy.
Mundan başga-da, okuw maslahatynyň dowamynda Deňizde adamyň janyny goramak barada (SOLAS-74) konwensiýanyň bölümleri boýunça BV klassifikasion jemgyýetiniň öňdebaryjy tejribesi öwrenildi.
ORIENT news
