“Türkmenaragatnaşyk” agentliginiň başlygy “Airbus”-yň wekiliýeti bilen gepleşikleri geçirdi
“Türkmenaragatnaşyk” agentliginiň başlygy Hajymyrat Hudaýgulyýew, “Airbus” kompaniýasynyň Gündogar Ýewropa we Merkezi Aziýa boýunça wise-prezidenti Žak Garrigiň ýolbaşçylygyndaky ýokary derejeli wekiliýeti bilen gepleşikleri geçirdi. Sişenbe güni, 6-njy fewralda geçirilen bu duşuşykda kosmos pudagynda ikitaraplaýyn hyzmatdaşlygyň geljegi ara alnyp maslahatlaşyldy.
Agentligiň web sahypasynda berilýän habara görä, “Airbus”-yň esasy tekliplerinden biri Türkmenistana uzakdan gözegçilik we kosmosdan surata düşürmek boýunça hyzmatlaryny bermek boldy.
Agentlikde Ýewropanyň iň uly howa giňişligi senagaty korporasiýasy bilen hyzmatdaşlygyň Türkmenistana kosmos işjeňligini ösdürmek, sebitde we dünýäde kosmos gözleglerini ösdürmek we bu ugurda halkara hyzmatdaşlygyny güýçlendirmek üçin ajaýyp mümkinçilikleri açýandygyny bellenildi.
ORIENT news
