Türkmenistan Laos bilen hyzmatdaşlygy giňeltmäge gyzyklanma bildirýär
Türkmenistanyň Prezidenti Serdar Berdimuhamedow Laos Halk Demokratik Respublikasy bilen ikitaraplaýyn hyzmatdaşlygy ösdürmäge gyzyklanma bildirdi. Bu barada döwlet Baştutanynyň iki ýurduň arasynda diplomatik gatnaşyklaryň ýola goýulmagynyň 30 ýyllygy mynasybetli iberen gutlagynda mälim edilýär.
“Döwlet Baştutanymyz Türkmenistanyň ikitaraplaýyn hyzmatdaşlygy giňeltmäge gyzyklanma bildirýändigini nygtady hem-de bilelikdäki tagallalaryň netijesinde halklarymyzyň bähbidine onuň mundan beýläk-de ösdüriljekdigine ynam bildirdi” diýip, Türkmenistanyň Döwlet habarlar agentligi mälim edýär.
Prezident Serdar Berdimuhamedow ýurtlaryň arasyndaky gatnaşyklaryň birek-birege hormat goýmak, deňhukuklylyk, ynanyşmak ýörelgelerine esaslanýandygyny belläp, Prezident Thonglun Sisulite tüýs ýürekden berk jan saglyk, bagtyýarlyk, abadançylyk, Laos Halk Demokratik Respublikasynyň halkyna bolsa mundan beýläk-de ösüş hem-de rowaçlyk arzuw etdi.
ORIENT news
