Kosmonawt Oleg Kononenko orbitada bolmak boýunça dünýä rekordyny täzeledi
«Roskosmos» kosmonawtlar otrýadynyň serkerdesi Oleg Kononenko kosmosda geçiren wagty boýunça dünýä rekordyny goýdy.
“TASS-yň” habar bermegine görä, 4-nji fewralda Moskwa wagty bilen sagat 11:30:08-de Kononenko kosmonawt Gennadiý Padalkiniň (1998 – 2015-nji ýyllar aralygynda) amala aşyran 5 missiýasynyň dowamynda orbitada geçiren 878 gün 11 sagat 29 minut 48 sekunt wagt görkezijisinden öňe geçýär.
Kosmonawtlar otrýadynyň komandiri häzirki wagtda öz ömründe 5-nji kosmos uçuşyny amala aşyrýar. 5-nji iýunda Moskwa wagty bilen sagat 00:00:20-de, ol Ýeriň daşynda jemi 1 müň gije-gündizini geçiren ilkinji adam bolar. Şeýle hem şol aý Kononenko özüniň 60 ýaş toýuny bellär. Şu gezekki syýahatyny hem goşanyňda, ol jemi 1 110 gününi kosmosda geçiren adam bolar.
Oleg Kononenko 1964-nji ýylyň 21-nji iýunynda Türkmenabat şäherinde doguldy. Ol kosmosa ilkinji syýahatyny 2008-nji ýylyň aprelinde amala aşyrdy. Şondan soň, oňa Russiýa Federasiýasynyň Gahrymany we uçarman-kosmonawty diýlen atlar berildi.
2019-njy ýylyň sentýabrynda bolsa, ol Türkmenistanyň Gahrymany boldy.
ORIENT news
