Özbek diplomatlary serhetüsti hyzmatdaşlygy ýokarlandyrmak boýunça Lebapda gepleşikleri geçirdi
Özbegistanyň Türkmenistandaky ilçihanasynyň wekilleri özbek önümleriniň eksportynyň mukdaryny artdyrmak, maýa goýumlaryny çekmek we serhetüsti söwda we ykdysady hyzmatdaşlygyny ösdürmek boýunça gepleşikleri geçirmek üçin Lebap welaýatyna baryp gördüler.
Diplomatlar Lebapda ýerleşýän “Türkmen Yyldyzy”, “Altyn Burgut” we “Şir Yag” kärhanalaryna tanyşlyk saparlaryny amala aşyrdylar.
Kabel öndürmäge ýöriteleşen “Türkmen Yyldyzy” kompaniýasynyň ýolbaşçylary bilen geçirilen gepleşiklerde direktor Gurbannazar Rejepow Özbegistandan elektrik geçiriji alýumin simleri we “PVX” plastmassalary satyn alýandygyny we bu önümleriň importynyň mukdaryny hasam artdyrmagy meýilleşdirýändigini habar berdi. “Dunyo” habar gullugynyň berýän habaryna görä, ol özbek hyzmatdaşlary bilen hyzmatdaşlykda mis kabel önümçiligini guramagyň maksadalaýykdygyny belledi.
“Şir Yag” kärhanasynda geçirilen duşuşykda, türk maýa goýumlarynyň we tehnologiýalarynyň gatnaşmagynda döredilen bu bilelikdäki kärhananyň häzirki wagtda ýokary hilli awtoulag ýaglaryny öndürýändigi we bu önümleri Özbegistana amatly nyrhlar bilen üpjün etmek isleýändigi bellenildi.
Bu nukdaýnazardan, taraplar “Şir Yag” wekiliýetiniň ýokary hilli we arzan motor ýaglary bilen üpjün etmek meselesini ara alyp maslahatlaşmak üçin Özbegistana saparyny guramak barada ylalaşdylar.
Pomidor ösdürip ýetişdirýän we Russiýa, Gazagystana we Gyrgyzystana eksport edýän “Altyn Burgut” kärhanasy bilen tanyşlyk döwründe direktor Begenç Çaryýew hem özbek kompaniýalary bilen hyzmatdaşlyga gyzyklanma bildirdiler.
Gepleşikler netijeli boldy we onuň jemleri boýunça degişli deslapky ylalaşyklar gazanyldy. Bu barada "Dunyo" HA belleýär.
ORIENT news
