Owgan işewürleri Merkezi Aziýa önüm iberilişini artdyrmakçy
Owganystanyň Senagat we söwda ministrligi geçen ýylda ýurduň Merkezi Aziýa ýurtlaryndan 1,4 milliard dollara barabar önümleri import edendigini, munuň ýerine 100 million dollarlyk harydy eksport edendigini mälim etdi.
Türkmenistandan import edilen harydyň pul hasabyndaky möçberi 417 million dollara, eksportyň möçberi hem 1 million dollara ýetýär. Bu barada "TOLO" habarlar agentligi mälim edýär.
Habar berlişine görä, Özbegistandan importyň möçberi 214 million dollara, eksportyň möçberi bolsa 19 million dollara, Gazagystan bilen degişlilikde 189 million we 32 million dollara, Täjigistan bilen 20 million we 19 million dollara barabar boldy. Diňe Gyrgyzystan bilen ýagdaý üýtgedi: Owganystan 1 million dollarlyk haryt import etdi we ýerine 7 million dollarlyk harydy bu ýurda iberdi. Şeýle hem Owganystanyň Russiýadan 315 million dollarlyk önüm import edendigi we bu ýurda 4 million dollarlyk haryt eksport edendigi bellendi.
Umuman alanyňda, degişli döwürde bu ýurtlar bilen söwda dolanyşygynyň möçberi 1 milliard 481 million dollara de boldy. Şonuň 1 milliard 380 million dollary importa, 100 million dollary hem eksporta degişlidir. Owganystanyň eksport edýän harytlarynyň agramly bölegini ter miwe öümleri, guradylan ir-iýmişler, sogan, ýeralma, miwe suwlary we dermanlyk ösümlikleri düzýär.
Ozal habar berşimiz ýaly, owganystanly işewürler öz önümlerini Aşgabatda guraljak sergide hem görkezmegi maksat edinýärler. Owganystanyň Söwda-maýa goýum palatasynda habar berlişine görä, bu sergi bir aýyň içinde guralar.
Owagnystanyň Senagat we söwda ministrliginiň mälim etmegine görä, geçen ýylda umumy bahasy 2 milliard dollara golaýlaýan önümler daşary ýurtlara eksport edilipdir. Eksport harytlarynyň esasy bölegi Hindistana, Pakistana, Hytaýa we Birleşen Arap Emirliklerine iberilýär.
ORIENT news
