Ýewropanyň Täzeleniş we ösüş bankynyň maliýe serişdeleriniň hasabyna Türkmenistanda 20-den gowrak taslamany durmuşa geçirmek işleri alnyp barylýar
Häzirki wagtda Ýewropanyň Täzeleniş we ösüş bankynyň maliýe serişdeleriniň hasabyna Türkmenistanda 22 sany taslamany durmuşa geçirmek boýunça degişli işler alnyp barylýar. Türkmenistan bu halkara maliýe edarasynyň 1992-nji ýylyň 1-nji iýunyndan bäri agzasy bolup durýar. Şondan bäri Ýewropanyň Täzeleniş we ösüş bankynyň maliýe serişdeleriniň hasabyna Türkmenistanda 87 sany dürli taslama durmuşa geçirildi. Bu barada Türkmenistanyň Döwlet habarlar agentligi mälim edýär.
Bu bank bilen Türkmenistanyň dokma senagaty, oba hojalygy, ulag, logistika pudaklarynda, hususy ulgamynda maýa goýumlary amala aşyrmak we karz serişdelerini gönükdirmek boýunça ysnyşykly hyzmatdaşlyk ýola goýuldy.
Wise-premýer, daşary işler ministri Raşid Meredowyň anna güni geçirilen Hökümet mejlisinde beren hasabatynda Ýewropa Bileleşigi bilen köpugurly hyzmatdaşlygy pugtalandyrmagyň ýurdumyzyň daşary syýasatynyň ileri tutulýan ugurlarynyň biri bolup durýandygy bellenildi. Şunda Ýewropanyň maliýe institutlary bilen netijeli gatnaşyklary ösdürmäge uly üns berilýär.
ORIENT news
