Türkmenistanyň nebitgaz ugurly ýokary okuw mekdebinde halkara maslahat we sergi guralar
19-njy aprelde Ýagşygeldi Kakaýew adyndaky Halkara nebit we gaz uniwersitetinde “Berkarar döwletiň täze eýýamynyň Galkynyşy döwründe talyp ýaşlaryň ylmy garaýyşlary” atly halkara ylmy-amaly maslahaty we sergisi geçiriler. Bu barada anna güni geçirilen Ministrler Kabinetiniň nobatdaky mejlisinde wise-premýer Nurmuhammet Amannepesowyň hasabatynda aýdyly diýip, Türkmenistanyň Döwlet habarlar agentligi mälim edýär.
Şeýle hem ady agzalan ýokary okuw mekdebinde talyplaryň arasynda II Açyk halkara informatika olimpiadasy geçiriler.
Prezident Serdar Berdimuhamedow Ýagşygeldi Kakaýew adyndaky Halkara nebit we gaz uniwersitetinde degişli halkara maslahaty we sergini, talyplaryň arasynda informatika dersleri boýunça olimpiadalary geçirmäge gowy taýýarlyk görmegi wise-premýere tabşyrdy.
Hökümet mejlisinde mälim edilişine görä, mart aýynda Arkadag şäheriniň 1-nji ýöriteleşdirilen okuw-terbiýeçilik toplumynda mekdep okuwçylarynyň arasynda halkara matematika olimpiadasy, Halkara ynsanperwer ylymlary we ösüş uniwersitetinde talyplaryň arasynda IV Açyk halkara matematika olimpiadasy hem geçiriler.
ORIENT news
