Türkmenistan we Ermenistan sport bilimi ulgamynda hyzmatdaşlyga gyzyklanma bildirýär
Türkmenistanyň Ermenistan Respublikasyndaky Adatdan daşary we Doly ygtyýarly ilçisi Muhammetgeldi Aýazow Ermenistan Respublikasynyň Bilim, ylym, medeniýet we sport ministriniň orunbasary Karen Giloýan bilen duşuşdy. Bu barada Türkmenistanyň Ýerewan şäherindäi ilçihanasy habar berýär.
Duşuşygyň dowamynda 2017-nji ýylda iki döwletiň sport ulgamynda jogapkär döwlet edaralarynyň arasynda gol çekilen özara düşünişmek hakyndaky Ähtnamanyň çäklerinde hyzmatdaşlyk etmek meselelerine üns berildi.
К.Giloýan Ermenistanyň demirgazyk şäheri bolan Gýumri şäheriniň GDA döwletleriniň 2024-nji ýylda sport paýtagty hökmünde yglan edilendigini habar berdi. Şol bir wagtda 2024-nji ýylda bu şäherde GDA agza döwletleriň Bedenterbiýe we sport boýunça geňeşiniň maslahatynyň geçiriljekdigini mälim etdi. Şeýle hem, Ermenistanyň 2023-nji ýylyň 1-nji sentýabryndan GDA döwletleriniň Bedenterbiýe we sport boýunça geňeşine ýolbaşçy hökmünde saýlanyp, başlyklyk edip gelýändigi aýtdy.
Taraplar Türkmenistanda we Ermenistanda geçirilýän sport-bilim çärelerine bu iki döwletiň wekilleriniň gatnaşmagyny üpjün etmäge taýýardyklaryny mälim etdiler.
Şunuň bilen baglylykda, türkmen agyr atletikaçylarynyň we suwda ýüzüjileriniň Tokiýoda geçirilen olimpiadadan öň Ermenistanyň sport toplumlarynda türgenleşikleri geçendigini bellemek bolar. Küşt boýunça wideoaragatnaşyk arkaly duşuşyk we okuw sapagy geçirildi. Türkmenistanyň Ermenistan Respublikasyndaky ilçihanasy tarapyndan bolsa her ýylda Bütindünýä Welosiped gününe bagyşlap, tigir sürmek boýunça çäreleri geçirmek däbe öwrüldi.
ORIENT news
