Türkmenistan we Koreýa Respublikasy habarlary alyşmaga gyzyklanma bildirýär
Türkmenistanyň Koreýa Respublikasyndaky ilçisi B.Durdyýew «The Korea Times» gazetiniň ýolbaşçysy we neşir edijisi O Ýong-jin bilen gepleşikleri geçirdi. Onda iki ýurduň arasynda hyzmatdaşlygy ösdürmek meselesi, şol sanda, köpçülikleýin habar beriş serişdeleriniň ugry boýunça özara gatnaşyklary mundan beýläk hem işjeňleşdirmek barada pikir alyşyldy. Bu barada Türkmenistanyň Koreýa Respublikasyndaky ilçihanasy habar berýär.
Duşuşygyň dowamynda ilçi öz söhbetdeşini Türkmenistanyň daşary we içeri syýasatynyň esasy ugurlary bilen tanyşdyrdy, ýurdumyzyň maglumat ulgamynda amala aşyrýan syýasatyna aýratyn üns berildi. Şu nukdaýnazardan, Türkmenistanda we Koreýa Respublikasynda geçirilýän möhüm wakalar bilen baglylykda täzelikleri we habarlary alyşmak babatynda halkara hyzmatdaşlygyň pugtalandyrylmagyna ygrarlylyk bildirildi.
Türkmenistanda şu ýylyň şygarynyň «Pähim-paýhas ummany Magtymguly Pyragy» diýlip atlandyrylmagynyň, 2024-nji ýylyň «Türki dünýäniň beýik şahyry we akyldary Magtymguly Pyragy ýyly» diýlip yglan edilmeginiň, şeýle hem Änewiň şu ýyl Türki dünýäsiniň medeni paýtagty diýlip edilmeginiň ähmiýeti barada koreý tarapyna gürrüň berildi.
Taraplar medeni-ynsanperwer ulgamda hyzmatdaşlyk ugurlaryny maslahatlaşdylar.
ORIENT news
