Türkmenistanyň Gruziýadaky ilçisiniň Gruziýanyň Milli Ylymlar akademiýasynyň prezidenti bilen duşuşygy
2024-nji ýylyň 31-nji ýanwarynda Türkmenistanyň Gruziýadaky Adatdan daşary we Doly ygtyýarly ilçisi Döwletmyrat Seýitmämmedow bilen Gruziýanyň Milli Ylymlar akademiýasynyň prezidenti Roin Metreweliniň arasynda duşuşyk geçirildi.
Duşuşygyň maksady, Türkmenistan bilen Gruziýanyň arasynda ylmy ugurda alnyp barylýan gatnaşyklary ösdürmekden we berkitmekden ybarat boldy. Taraplar akademiki işleri ulgamynda öz ýurtlarynda alnyp barylýan özgertmeler we ýetilen sepgitler bilen tanyşdyrdylar.
Duşuşykda ilçi D.Seýitmämmedow şu ýyl Gündogaryň beýik akyldary we nusgawy şahyry Magtymguly Pyragynyň doglan gününiň 300 ýyllygy halkara derejesinde dabaraly ýagdaýda bellenilýändigini aýtdy, şeýle hem Türkmenistanda 2024-nji ýylyň şygary “Pähim-paýhas ummany Magtymguly Pyragy” bu ýubileý güni bilen baglydygyny belläp geçdi.
Ilçi bu möhüm waka bilen baglylykda Türkmenistanda we onuň çäginiň daşynda köp sanly çäreleriň meýilleşdirilendigini aýtdy. Gruziýanyň Milli Ylymlar akademiýasynyň prezidenti öz gezeginde mundan beýläk hem hyzmatdaşlygy dowam etmäge taýýardygyny mälim etdi we Magtymguly Pyraga bagyşlanan halkara maslahaty geçirmegi teklip etdi. Akademik Roin Metreweli bular ýaly çäreler beýik türkmen şahyr-filosofik Magtymguly Pyragynyň baý edebi mirasynyň mundan beýläk-de öwrenilmegine we dünýäde giňden ýaýramagyna, şeýle hem medeni-ynsanperwer hyzmatdaşlygyň pugtalandyrylmagyna ýardam berjekdigine ynam bildirdi.
Taraplar iki ýurduň Ylymlar akademiýasynyň alymlarynyň arasyndaky hyzmatdaşlygy ösdürmek, bilelikdäki ylmy çäreleri geçirmek, şeýle hem akademiki işjeňlik maksatnamasynyň durmuşa geçirilmegini dowam etdirmek barada ylalaşdylar.
ORIENT news
