Balkan welaýatyndaky ekerançylyk ýerlerinde häzirki zaman tehnikalary ulanylýar
Balkan welaýatynyň oba hojalyk işgärleri ekerançylyk ýerlerinde dürli oba hojalyk işlerini geçirmekde häzirki zaman tehnikalaryny ulanýarlar.
Welaýatyň daýhanlarynyň geçen ýyl döwlet harmanyna pagta tabşyrmak boýunça meýilnamany üstünlikli ýerine ýetirendikleri bellärliklidir. Bu üstünligi şu ýylda hem gazanmak üçin ýerli ekerançylar yhlasly zähmet çekýärler.
Ýazky gowaça ekişine taýýarlyk görmek we güýzki bugdaýa ideg etmek boýunça işlere welaýatyň Oba hojalyk önümçilik birleşiginiň Bereket etrabyndaky tehniki hyzmat ediş kärhanasynyň hünärmenleri ýakyndan ýardam edýärler. Bu barada "Balkan" gazetinde habar berilýär.
Ady agzalan kärhananyň bölüm müdiri Röwşen Satlykowyň bellemegine görä, häzirki wagtda gowaça ekmek üçin bölünip berlen ýerlerde sürüm işleri tamamlandy we 2 650 gektar ýerde tekizleýiş işleri alnyp baryldy.
Etrapda gowaça ekiş möwsüminde ulanyljak tehnikalaryň 60-dan gowragy doly taýýar edildi.
Şol bir wagtda kärhananyň ussalary tarapyndan bugdaý orýan kombaýnlary galla oragy möwsümine taýýarlamak işleri alyp barylýar.
Ýerlerde hereket edýän ýörite toparlar ýeterlik mukdarda ýangyç we çalgy ýaglary hem-de ätiýaçlyk şaýlary bilen üpjün edilýär.
ORIENT news
