Rus ruhanysy Türkmenistana iş saparyny tamamlady
Arhiýepiskop Feofilakt Türkmenistana 4 günlük iş saparyny tamamlady. Onuň barşynda Rus prawoslaw ybadathanasynyň wekili Türkmenistanyň birnäçe ýerlerine, şol sanda Aşgabat şäherinde ýerleşýän A.S.Puşkin adyndaky Bilelikdäki türkmen-rus mekdebine baryp gördi. Bu barada Moskwa patriarhaty habar berýär.
Aşgabatdaky mekdebe saparynyň dowamynda ol okuw jaýynyň direktory Irina Kuminowa we mugallymlar bilen duşuşdy hem-de mekdebiň döredilmeginiň 22 ýyllygy mynasybetli olara ýadygärlik sowgatlaryny berdi. Şeýle hem rus ruhanysy bu ýerde bilim alýan çagalaryň ýetişigi bilen gyzyklandy.
Aleksandro-Newskiý ybadathanasynda guralan baýramçylyk dabarasynda dünýäniň dürli dillerindäki goşgular okaldy. Onda Magtymguly Pyragynyň goşgularyna hem aýratyn orun berildi.
Rus arhiýepiskopy saparynyň dowamynda şeýle-de Russiýanyň ilçihanasynyň wekilleri, Watikanyň Aşgabatdaky merkeziniň medeniýet boýunça attaşesi, ruhany Anjeý Madeý bilen duşuşyklary geçirdi.
Arhiýepiskop Feofilakt bu ýerde işleýän ruhanylaryň hemmesine işlerinde üstünlikleri arzuw etdi we ýagşy dilegleri etdi.
ORIENT news
