Türkmenistan koreý köpçülikleýin habar beriş serişdesi bilen hyzmatdaşlyga gyzyklanma bildiýär
Ilçi Begenç Durdyýew "The Korea Herald" habarlar agentliginiň Baş direktory bilen gepleşikleri geçirdi. Onda hyzmatdaşlyk gatnaşyklaryny ýola goýmak meseleleri maslahatlaşyldy diýip, Türkmenistanyň Koreýa Respublikasyndaky ilçihanasy habar berdi.
Duşuşygyň dowamynda ilçi öz söhbetdeşini Türkmenistanyň daşary we içeri syýasatynyň esasy ugurlary bilen tanyşdyrdy, ýurdumyzyň maglumat ulgamynda amala aşyrýan syýasatyna aýratyn üns berildi. Şu nukdaýnazardan, Türkmenistanda we Koreýa Respublikasynda geçirilýän möhüm wakalar bilen baglylykda täzelikleri we habarlary alyşmak babatynda halkara hyzmatdaşlygyň pugtalandyrylmagyna ygrarlylyk bildirildi.
Ilçi Begenç Durdyýew şeýle hem Türkmenistanda şu ýylyň "Pähim-paýhas ummany Magtymguly Pyragy" ýyly diýlip yglan edilmeginiň ähmiýeti, akyldar şahyryň doglan gününiň 300 ýyllygyny bellemek bilen bagly geçiriljek çäreler, Änew şäheriniň Türki dünýäsiniň medeni paýtagty diýlip yglan edilmegi barada Baş direktora gürrüň berdi.
Duşuşygyň barşynda degişli şanly seneleri açyp görkezýän wideorolik hem görkezildi.
ORIENT news
