Türkmenistanyň DIM-de türkmen-hytaý hyzmatdaşlygynyň meseleleri ara alnyp maslahatlaşyldy
Duşenbe güni, 29-njy ýanwarda Türkmenistanyň Daşary işler ministrliginiň binasynda ýurduň DIM-niň ýolbaşçysy Raşid Meredow bilen Hytaý Halk Respublikasynyň Halk wekilleriniň Ählihytaý ýygnagynyň hemişelik komitetiniň başlygynyň orunbasary Hao Minsziniň arasynda duşuşyk geçirildi.
Söhbetdeşlikde taraplar dürli pudaklarda hemmetaraplaýyn hyzmatdaşlygyň meselelerine ünsi çekdiler we ikitaraplaýyn gatnaşyklaryň ösüş depginini bellediler. Söhbetdeşler, şeýle hem, 2021-2025-nji ýyllar aralygynda ýurtlaryň arasynda baglaşylan hyzmatdaşlyk etmek hakyndaky Maksatnamasynyň ähmiýetini nygtamak bilen bu ugurdaky ýakyn hökümetara hyzmatdaşlygynyň bardygyny bellediler.
Gepleşikleriň dowamynda wekiliýetler iki ýurduň Daşary işler ministrlikleriniň arasynda syýasy geňeşmeleri geçirmegi maslahatlaşdylar. Ykdysadyýet, bilim we medeniýet pudaklarynda döredilen özara gatnaşyklaryň ýokary derejesine hem aýratyn üns berildi.
ORIENT news
