Premýer-ministr wezipesinden el çekdi
Irakliý Garibaşwili Gruziýanyň Premýer-ministri wezipesinden el çekdi.
"Men toparymyz bilen geçiren maslahatlaşmalarymyzyň netijesinde gelnen çözgüt barada halk köpçüligini habarly etmek isleýärin. Şu gün men Premýer-ministrlik wezipesinden el çekýärin" diýip, Garibaşwili ýörite geçirilen brifingde aýtdy. Mälim edilişine görä, ol "Gruzin arzuwy - Demokratik Gruziýa" dolandyryjy partiýa ýolbaşçylyk etmek teklibini kabul edipdir.
"Toparda üstünlik gazanyp biljek köp sany ýolbaşçylar bar we olara mümkinçilik bermek hem gerek. Mundan daşary, biziň öňümizde täze wezipeler dur - Güýzde biz parlamentiň täze agzalaryny düzmeli hem-de has belent sepgitlere ýetmek üçin "Gruzin arzuwynyň" saýlawlarda ynamly ýeňiş gazanmagy üçin taýýarlyk işlerini alyp barmaly" diýip Irakliý Garibaşwili aýtdy.
Ol Premýer-ministrlik döwründe ýurduň bähbitlerini ygtybarly gorandygyny, alnyp barlan işlere halkyň guwanýandygyny hem belledi.
Garibaşwili eýýäm ikinji gezek Premýer-ministrlik wezipesinde çetleşýär. Ol Hökümet ýolbaşçylygyna Bidzina Iwanişwiliden soň, 2013-nji ýylda saýlanypdy. Irakliý Premýer-ministrlige ikinji gezek 2021-nji ýylyň 22-nji fewralynda saýlandy.
Gruziýanyň täze Premýer-ministriniň ady resmi ýagdaýda 1-nji fewralda yglan ediler. Gruziýanyň köpçülikleýin habar beriş serişdeleri häzirki wagtda dolandyryjy partiýa bolup çykyş edýän "Gruzin arzuwy" partiýasynyň ýolbaşçysy Irakliý Kobahidze esasy dalaşgär hökmünde görýärler.
ORIENT news
