Mejlisde HHR-iň Halk wekilleriniň Ählihytaý ýygnagynyň hemişelik komitetiniň Başlygynyň orunbasary bilen gepleşikler geçirildi
Türkmenistanyň Mejlisiniň Başlygy D.Gulmanowanyň öz ýurdunyň wekiliýetine ýolbaşçylyk edip Türkmenistana iş sapary bilen gelen Hytaý Halk Respublikasynyň Halk wekilleriniň Ählihytaý ýygnagynyň hemişelik komitetiniň Başlygynyň orunbasary Hao Minszin bilen duşuşygy boldy.
Mejlisiň Başlygy myhmanlary Türkmenistanda dürli ugurlarda amala aşyrylýan giň gerimli özgertmeler maksatnamalarynyň durmuşa geçirilmeginde kanunçylyk binýadynyň üpjün edilişi bilen tanyşdyrdy.
Köpugurly ikitaraplaýyn hyzmatdaşlygy pugtalandyrmakda parlamentara dialogyň möhüm orny eýeleýändigi bellenildi.
Duşuşygyň dowamynda syýasy-diplomatik, söwda-ykdysady, medeni-ynsanperwer ulgamlarda özara bähbitli dialogy pugtalandyrmak boýunça gyzyklanma bildirilip pikir alşyldy.
Döwletara hyzmatdaşlykda ynsanperwer gatnaşyklara aýratyn orun berilýär. Ýaş türkmenistanlylaryň köp sanlysy HHR-iň ýokary okuw mekdeplerinde bilim alýarlar. Ýurdumyzdaky birnäçe ýokary we orta bilim edaralarynda hytaý dili öwredilýär. Geçen ýylyň ahyrynda Aşgabatda Hytaýyň Türkmenistandaky Medeniýet ýylynyň açylmagy, Mary şäherinde Merkezi Aziýa ýurtlarynyň we Hytaýyň ýaşlarynyň forumynyň geçirilmegi bu ugurda netijeli hyzmatdaşlygyň anyk mysallarydyr.
ORIENT news
