Türkmenistanyň Ulag we kommunikasiýalar toplumynyň we saglygy goraýyş ulgamynyň wekilleri ýapon kärdeşleri bilen gepleşikleri geçirdiler
Türkmenistanyň Ulag we kommunikasiýalar agentliginiň Baş direktory Mämmethan Çakyýew ýolbaşçylygyndaky topar, şeýle hem Saglygy goraýyş we derman senagaty ministrliniň wekilleri Ýaponiýanyň Sanly özgeriş agentliginiň ýolbaşçylary bilen gepleşikleri geçirdiler. Bu barada Türkmenistanyň Ýaponiýadaky ilçihanasy habar berýär.
Bellenişi ýaly, duşuşykda tejribe alyşmak, bilelikdäki taslamalary döretmek, bilim maksatnamalaryny işläp düzmek we maslahat beriş goldawyny bermek meseleleri ara alnyp maslahatlaşyldy.
Duşuşygyň maksady bilelikdäki işi we sanly tehnologiýalary mundan beýläk-de ösdürmek üçin özara gyzyklanma bildirilýän hyzmatdaşlyk mümkinçiliklerini we ugurlaryny kesgitlemekden ybarat boldy. Taraplaryň belleýşi ýaly, degişli ulgamlardaky özara hyzmatdaşlyk sanly tehnologiýalary ösdürmek üçin täze mümkinçilikler açýar we bu möhüm ugurda has çuňňur özara düşünişmäge we hyzmatdaşlygy ösdürmäge ýardam berer.
ORIENT news
