Düýede 560 kilometr ýol geçer
Jahankeşde Fýodor Konýuhow rus-arap toparynyň düzüminde Birleşen Arap Emirlikleriniň çöllerine iki hepdelik syýahata ugrady. Bu barada "TASS" habarlar agentligi mälim edýär. "7 emirligiň üsti bilen" diýlip atlandyrylýan syýahatyň ýoly Abu-Dabi, Dubaý, Şarja, Ras-el-Haýmy, Ajman, Fujeýra we Umm-el-Kaýweýna sebitleriniň üstünden geçer.
Umuman alanyňda, syýahatçy iki hepdäniň dowamynda düýede 560 kilometre golaý ýol geçer. Ol syýahatyna Abu Dabi Emirliginiň Al-Aýn şäherinden ýola düşdi. Kerwen gündizine 30-40 kilometr ýol geçer we gün ýaşanda dynç almak üçin düşlär. Onuň gije düşlejek ýerleri beduinleriň gadymy ýaşan mekanlary we boýy 5 gatly bina barabar bolan çäge alaňlarynyň arasy bolar.
KonÝuhowyň kerwen ekspedisiýalaryny guramakda ýeterlik tejribesi bar. Ol 2002-nji ýylda Kalmykiýada, Astrahan we Wolgograd sebitlerinde, Dagystanda we Stawropol ülkesinde düýede “Uly ýüpek ýoly arkaly” atly syýahat ugry boýunça 1 müň kilometrden gowrak ýol geçipdi. Konýuhow 2009-njy ýylda mongol we galmyk kärdeşleri bilen bilelikde gündogardan günbatara bütin Mongoliýa syýahat etdi. 2011-nji ýylda dünýäniň iň yssy ýerleriniň biri bolan Efiopiýanyň Danakil çölüniň 1 müň 200 kilometrini 40 günde geçmegi başardy.
Ol Ýer şarynyň iň howply we näbelli ýerlerine 50-den gowrak ekspedisiýany gurap, jemi 25 gezek dünýä rekordyny goýdy. Şolaryň käbiri Ginnesiň rekordlar kitabyna hem girizilendir. Ol Ýer şarynyň daşyndan 4 gezek, Atlantik ummanyny hem 17 gezek ýüzüp geçdi. Şeýlelikde, ol Ýer ýüzünde planetamyzyň bäş polýusyna ýeten ilkinji adam boldy: Demirgazyk we Günorta geografiki polýuslar, Demirgazyk buzly ummandaky otnositellik hadysasy bolmaýan polýus, Ewerest (beýiklik polýusy), Gorn burny (ýahtaçylaryň polýusy). Mundan başga-da, ol Demirgazyk we Günorta polýuslardan we Ewerest ýaly dünýäniň ýedi iň beýik dagyndan ybarat “Adventures Grand Slam” atly programmasyny ilkinji bolup tamamlady. Ol häzir 72 ýaşyndadyr.
ORIENT news
