Türkmenistanyň hemişelik wekili BMG-niň Terrorçylyga garşy göreşmek müdirligi bilen hyzmatdaşlygyň esasy ugurlaryny beýan etdi
Türkmenistanyň BMG-niň ýanyndaky hemişelik wekili Aksoltan Ataýewa BMG-niň Terrorçylyga garşy göreşmek müdirliginiň Merkezi Aziýada durmuşa geçirýän taslamalaryna bagyşlanyp her ýylda geçirilýän brifingine gatnaşdy. Bu barada Türkmenistanyň Daşary işler ministrliginiň metbugat gullugy habar berýär.
"Merkezi Aziýa döwletleri häzirki wagtda BMG-niň Terrorçylyga garşy göreşmek müdirliginiň sebitde durmuşa geçirýän 15 maksatnamasynyň çäklerinde terrorçylyga we zorlukly ekstremizmlere garşy göreşmek we öňüni almak boýunça milli, sebit we halkara derejelerinde şahsy we toparlaýyn tagallalaryny giňeltmegi dowam etdirýärler" diýip, BMG-niň Terrorçylyga garşy göreşmek müdirliginiň ýolbaşçysy mälim etdi.
Ol şeýle-de müdirlige berilýän goldaw-kömeklere hoşallyk bildirdi. Bu işde Türkmenistanyň edýän ýardamlary hem uly ähmiýete eýedir. Bellenişi ýaly, şunuň ýaly özygtyýarly maliýe goldawlary BMG-niň esasy maliýe çeşmeleri bolup durýar.
Türkmenistanyň BMG-niň ýanyndaky hemişelik wekili BMG-niň Terrorçylyga garşy göreşmek müdirligi bilen hyzmatdaşlygyň esasy ugurlary barada durup geçdi. Şunda öňüni alyş we irki habardar etmek işlerinde bar bolan gurallary netijeli işletmek, şeýle hem energetika we ulag desgalarynyň howpsuzlygyny we durnuklygyny üpjün etmek esasy ugurlar hökmünde bellendi.
ORIENT news
