Eýranyň Horasan-Rezawi sebitiniň häkimi Türkmenistanyň Daşary işler ministrliginde kabul edildi
Türkmenistanyň daşary işler ministriniň orunbasary Ahmet Gurbanowyň Eýran Yslam Respublikasynyň Horasan-Rezawi welaýatynyň häkimi Ýakub Ali Nazari bilen duşuşygy geçirildi. Bu barada Türkmenistanyň Daşary işler ministrligi habar berýär.
Duşuşygyň dowamynda taraplar Türkmenistanyň Eýran bilen hyzmatdaşlygynyň häzirki ýagdaýy we geljegi barada pikir alyşdylar.
Söhbetdeşler ikitaraplaýyn gatnaşyklaryň özara ynama eýe bolan häsiýetini belläp, onuň yzygiderli we depginli ösdürilmegine ýokary derejedäki gepleşikleriň täsir edýändigini nygtadylar.
Taraplar iki döwletiň sebitleriniň arasyndaky gatnaşyklary işjeňleşdirmäge bolan gyzyklanmasyny beýan etdiler. Bu babatynda Türkmenistanyň Mary welaýaty bilen Eýranyň Horasan-Rezawi welaýatynyň arasynda gol çekilen Ähtnama üns çekildi.
Duşuşykda Eýranyň Horasan-Rezawi welaýatynyň häkiminiň ýolbaşçylygyndaky wekilýetiniň Türkmenistana amala aşyran saparynyň ozal gol çekilen resminamany iş ýüzünde durmuşa geçirmekde wajyp ähmiýete eýedigi hem bellenildi.
Mundan ozal, Eýranyň Horasan-Rezawi welaýatynyň häkiminiň ýolbaşçylygyndaky wekiliýetiň Mary welaýatyna iş saparyny amala aşyrandygyny habar beripdik.
ORIENT news
