BAE-niň “WAM” habarlar agentliginiň wekiliýeti türkmen metbugaty bilen hyzmatdaşlygy ýola goýýar
Birleşen Arap Emirlikleriniň resmi habarlar agentligi bolan - WAM-nyň wekiliýeti ilkinji iş sapary bilen Aşgabatda bolup, şol döwürde ikitaraplaýyn hyzmatdaşlygyň geljegi we Türkmenistanyň KHBS bilen maglumat alyş-çalşygyny giňeltmegiň ýollary ara alnyp maslahatlaşylýar.
Wekiliýet birnäçe gurama baryp gördi we resmi wekiller bilen duşuşyp, noýabr aýynda Abu-Dabide geçiriljek 3-nji Ählumumy media kongresine gatnaşmaga çagyrdy.
Saparyň dowamynda agentligiň Baş müdiri Mohammed Jalal Al Raissiniň ýolbaşçylygyndaky wekiliýet Türkmenistanyň Ministrler Kabinetiniň Başlygynyň orunbasary Mährijemal Mämmedowa, Türkmenistanyň Daşary işler ministriniň orunbasary Mähri Bäşimowa we Türkmenistanyň Telewideniýe, radiogepleşikler we kinematografiýa baradaky döwlet komitetiniň ýolbaşçysy Arslan Aşyrow bilen duşuşdy. Bu barada “WAM” habar berýär
Taraplar BAE bilen Türkmenistanyň arasynda metbugat pudagynda hyzmatdaşlygy ösdürmegi ara alyp maslahatlaşdylar. Duşuşyklarda Mohammed Jalal Al Raissi 1-nji we 2-nji Ählumumy media kongresiniň netijeleriniň gysgaça mazmunyny hödürledi. Bu halkara çäräniň žurnalistlere ylham berýän we ösüşe ýetmekde, aragatnaşyk, özara düşünişmek, hyzmatdaşlyk we dürli medeniýetleriň wekilleriniň arasynda parahatçylykly ýaşamagyň gymmatlyklaryny wagyz etmekde köpçülikleýin habar beriş serişdeleriniň netijeliligini ýokarlandyrmaga ýol açýan täze bilimleri bermekdäki roluny belläp geçdi.
Türkmen tarapy, iki ýurduň baýlyklary, medeni we ykdysady mümkinçilikleri bilen tanyşmaga goşant goşýan köpçülikleýin habar beriş serişdeleriniň ähli ugurlary boýunça WAM bilen hyzmatdaşlygy goldaýar.
ORIENT news
