Türkmenistanyň Daşary işler ministrliginde Şweýsariýanyň täze ilçisi bilen duşuşyk geçirildi
Duşenbe güni, 22-nji ýanwarda Türkmenistanyň daşary işler ministriniň orunbasary Mähri Bäşimowa Şweýsariýa Konfederasiýasynyň Adatdan daşary we Doly ygtyýarly ilçisi Tomas Şteliniň ynanç hatynyň nusgalaryny kabul etdi.
Duşuşykda taraplar döwletara gepleşiklerini giňeltmek boýunça çäreleri ara alyp maslahatlaşdylar. Diplomatik gatnaşyklary güýçlendirmek üçin esasy mehanizmler hökmünde Daşary işler ministrlikleriniň arasynda geňeşmeleri geçirmegiň we onuň hukuk binýadyny täzelemegiň ähmiýeti nygtaldy.
Şeýle hem, söhbetdeşlik wagtynda Türkmenistan Daşary işler ministrliginiň ýolbaşçysynyň orunbasary söwda-ykdysady gatnaşyklaryň gerimini giňeltmegi teklip etdi. Diplomatlar bilelikdäki iş forumlaryny geçirmek, söwda-ykdysady saparlaryny guramak we suw baýlyklaryny dolandyrmak pudagynda hyzmatdaşlygy ýola goýmak meselelerine ünsi çekdiler.
ORIENT news
