Baku şäherinde Azerbaýjanyň, Türkiýäniň we Merkezi Aziýa döwletleriniň aeronawigasiýa düzümleriniň ilkinji sammiti geçirilýär
Baku şäherinde "CANSO" ady bilen Azerbaýjanyň, Türkiýäniň, Gazagystanyň, Gyrgyzystanyň, Täjigistanyň, Türkmenistanyň we Özbegistanyň aeoronawigasiýa düzümleriniň ýolbaşçylarynyň ilkinji sammiti geçirilýär. Bu barada "Azertag" habarlar agentligi mälim edýär.
"CANSO" - bu aeronawigasiýa hyzmatlaryny üpjün ediji halkara guramadyr.
Forumda sebitdäki ösüş we howa hereketine gözegçilik meseleleri ara alnyp maslahatlaşylýar. 25-nji ýanwara çenli dowam etjek sammitiň ahyrynda uçuş howpsuzlygyny ýokarlandyrmaga we bilelikdäki işleriň netijeliligini ýokarlandyrmaga gönükdirilen özara ylalaşylan çözgütler kabul ediler.
Awiasiýa işine esasy gatnaşyjylar hökmünde çykyş edýän howa nawigasiýa hyzmatyny üpjün edijiler uçuş howpsuzlygyny üpjün etmek, sebitdäki howa ulag ugurlaryny ösdürmek we uçarlaryň ýurtlaryň howa giňişliginden üstaşyr geçişini üpjün etmek üçin jogapkärdirler. Olar ählumumy derejede howa ulag zynjyryny üpjün etmek, uçuşlaryň netijeliligini ýokarlandyrmak, durnukly ösüşi goldamak we daşky gurşawa ýetirilýän täsirleri azaltmak üçin şertleri döredýärler.
Türkmenistanyň howa giňişliginde uçarlar üçin howa nawigasiýa hyzmatlary, uçuşlaryň howpsuzlygy kabul edilen halkara ülňülere laýyklykda üpjün edilýär. Soňky ýyllarda awiakompaniýalara uçuşlaryň bahasyny we howa ýollaryndaky kynçylyklary azaltmaga mümkinçilik berýän goşmaça täze halkara ugurlar açyldy.
Şeýle hem daşary ýurt awiakompaniýalarynyň uçarlarynyň Türkmenistanyň çägine uçmagy we tehniki gonmagy üçin rugsat bermegiň ýönekeýleşdirilen tertibi işe girizildi. Bu bolsa ýurduň çäklerinde uçuşlaryň ep-esli artmagyna mümkinçilik döretdi.
ORIENT news
