Türkmen diplomatlary halkara hünär kämilleşdiriş okuwlaryna gatnaşýarlar
Türkmenistanyň Russiýadaky ilçihanasynyň geňeşçisi Annamyrat Altyýew “Uly Ýewraziýa giňişliginde ösüş mümkinçilikleri we wehimleri” atly maksatnamanyň çäklerinde hünär derjesini ýokarlandyryş okuwlaryna gatnaşdy. Bu okuwlar Moskwanyň Halkara gatnaşyklary döwlet instituty, Russiýanyň Daşary işler ministrligi we BMG-niň Okuw we ylmy-barlaglar instituty (ÝUNITAR) tarapyndan guraldy.
Okuwlara GDA agza döwletleriň, şeýle hem Mýanma, Wýetnam, Laos we Kamboja ýaly ýurtlaryň döwlet işgärleri we diplomatlary gatnaşdylar. Okuw maksatnamasynyň iş meýilnamasyna milli, sebit we ählumumy derejede dünýä ösüşiniň durnuklylygyny üpjün etmek meseleleri girizildi. Okuwlary Moskwanyň Halkara gatnaşyklary döwlet institutynyň we Ýokary ykdysadyýet mekdebiniň professor-mugallymlary alyp bardylar.
Şeýle görnüşdäki okuwlar 2011-nji ýyldan bäri geçirilip gelinýär. Şondan bäri şeýle okuwlaryň 11 tapgyry geçirilip, oňa jemi GDA agza döwletlerden 350-ä golaý diplomat gatnaşdy. Şu gezekki okuwlarda gatnaşyjylar Uly Ýewraziýa giňişligindäki ykdysady ugurlary, tehnologiýa ösüşine aýratyn üns berdiler. Onuň çäklerinde dürli medeni çäreler hem geçirildi.
ORIENT news
