Gurbanguly Berdimuhamedow Arkadag şäheriniň täze Athana toplumyna baryp gördi
Şenbe güni türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Köpetdagyň Arkadag şäheriniň täze Athana toplumyna baryp gördi we täze "akylly" şäheriň gurluşygynyň ikinji tapgyrynda ýerine ýetiriljek taslamalar bilen tanyşdy. Bu barada Türkmenistanyň Döwlet habarlar agentligi mälim edýär.
Görkezilen taslamalaryň hatarynda Oba hojalyk uniwersitetiniň binalar toplumynyň, senagat ugurly desgalaryň, muzeýiň, Saglyk öýüniň, Ýangyna garşy göres gullugy binasynyň, “Saglyk” seýilgähiniň teklip edilýän şekil taslamalary bar. Şeýle hem bu ýerde Arkadag şäherniň Baş metjidiniň içki bezeg aýratynlyklaryna, lukmançylyk edaralarynyň klasterine degişli nyşanlaryň görnüşlerine degişli taslamalar görkezildi.
Gurbanguly Berdimuhamedow görkezilen şekil taslamalar bilen tanşyp, Oba hojalyk uniwersitetiniň binalar toplumynyň taslamalaryna birnäçe belliklerini aýtdy we olara degişli düzedişleri girizdi. Şeýle hem täze şäheriň gurluşygynyň ikinji tapgyrynda ýaýbaňlandyrylan işleriň yzygiderli gözegçilikde saklanylmalydygyny aýtdy.
Halk Maslahatyň Başlygy şeýle-de 60-a golaý bedewe niýetlenen birnäçe athananyň, toplumyň ot-iým bilen üpjünçiliginde ähmiýetli bolan täze ammarlaryň ýapyk manežiň taslamasy bilen-de tanyşdy.
ORIENT news
