Yrak: türkmen gazyny import etmek boýunça ähli şertler ýerine ýetirildi
Yragyň energetika ministri Ahmed Musa türkmen gazyny import etmek boýunça ähli şertleriň ýerine ýetirilendigini we meseleleriň oňyn çözülendigini aýdýar. Onuň sözlerine görä, türkmen gazynyň Eýranyň çäklerinden akdyryljakdygyny göz öňünde tutup, degişli meseleleriň eýran tarapy bilen hem maslahatlaşmagyň zerurdygyny belläp geçdi. Bu barada "Iraqi News Agency" habarlar agentligi mälim edýär.
Häzirki wagtda Yrakda elektrik energiýasyny öndürmek üçin ýangyç hökmünde hyzmat edýän tebigy gazyň ýetmezçiligi duýulýar. Bu meseläniň oňyn çözmek üçin Türkmenistanyň we Yragyň bähbitleri göz öňünde tutulyp, türkmen tebigy gazyny Eýranyň gaz geçiriji ulgamlary arkaly ibermek barada ylalaşyldy. Munuň üçin eýran tarapy degişli turbageçiriji ulgamlaryny döwrebaplaşdyrmak işlerini alyp barýar. Taýýarlyk işlerini öňümizdäki aýyň birinji hepdesinde tamamlamak göz öňünde tutulýar.
Oňa çenli Yrak we Eýran energiýa ibermeleri boýunça özara ylalaşyga gelmek üçin birnäçe gepleşikleri geçirýärler. Bellenişi ýaly bu gepleşikler häzirki wagtda işjeň dowam etdirilýär.
ORIENT news
