Gurbanguly Berdimuhamedow Arkadag şäherine ilaty göçürip getirmekde säwliklere ýol berilýändigi üçin nägilelik bildirdi
Türkmen halkynyň Milli Lideri Gurbanguly Berdimuhamedow Arkadag şäheriniň döwrebap ýaşaýyş jaýlaryna ilaty göçürip getirmek işinde säwliklere ýol berilýändigi üçin Arkadag şäheriniň häkimi Şamuhammet Durdylyýewiň işine nägilelik bildirdi. Bu barada Türkmenistanyň Halk Maslahatynyň Başlygynyň Arkadag şäherine bolan iş saparynyň dowamynda mälim edildi diýip, Türkmenistanyň döwlet telewideniýesi habar berýär.
Gurbanguly Berdimuhamedow Arkadag şäheriniň häkimi Şamuhammet Durdylyýewe we Arkadag şäherini gurmak boýunça döwlet komitetiniň başlygy Derýageldi Orazowa ýüzlenip, ýol berlen säwlikleri gysga wagtda düzetmek we Arkadag şäheriniň hemmetaraplaýyn sazlaşykly ösüşi bilen baglanyşykly meseleleri yzygiderli gözegçilikde saklamak babatda birnäçe anyk görkezmeleri berdi.
Gurbanguly Berdimuhamedow ýaşaýyş jaýlaryna ilatyň göçürilmegi bilen baglanyşykly meselelere örän jogapkärçilikli we hemmetaraplaýyn esasda çemeleşilmelidigini belledi. Halkymyzyň bagtyýar durmuşyň hözirini görüp ýaşamaklary ugrunda ähli zerur tagallalar edilmelidir. Şunda söwdanyň medeniýetini ýokarlandyrmak, hyzmatlar ulgamynda bökdençlikleriň ýüze çykmagynyň öňüni almak häzirki döwrüň möhüm wezipesi hökmünde kesgitlenendir.
ORIENT news
