3-nji türkmen-hytaý ylmy-innowasion forumy geçiriler
Şu ýyl Türkmenistanda 3-nji türkmen-hytaý ylmy-innowasion forumy geçiriler. Bu barada wise-premýer Nurmuhammet Amannepesow anna güni geçirilen Ministrler Kabinetiniň mejlisinde mälim etdi.
Şeýle görnüşdäki ikitaraplaýyn ylmy-innowasion forum iň soňky gezek 2018-nji ýylda Hytaýyň Uhan şäherinde geçirilpdi. Ol türkmen we hytaý alymlarynyň, işewür wekilleri we Hökümet agzalary üçin hyzmatdaşlygyň geljegini maslahatlaşmak üçin amatly giňişligi döredipdi.
Şeýle hem şu ýylda beýik türkmen şahyry we Gündogaryň akyldary Magtymguly Pyragynyň doglan gününiň 300 ýyllygy mynasybetli “Magtymguly Pyragy we umumadamzat medeni gymmatlyklary” atly halkara ylmy maslahaty geçirmek göz öňünde tutulýar.
Wise-premýeriň belleýşi ýaly, şu ýylyň işleriniň meýilnamalary işlenip düzülende, ýurduň ýeten belent sepgitlerini, halkara abraýyny, milliligi, däp-dessurlary, edep-terbiýäni, maşgala mukaddesligini wagyz etmek, şeýle hem birnäçe medeni-durmuş maksatly çäreleri, maslahatlary geçirmek wezipeleri göz öňünde tutuldy.
Prezident Serdar Berdimuhamedow wise-premýeriň gözegçilik edýän ulgamlarynyň we jemgyýetçilik guramalarynyň şu ýyl üçin iş meýilnamalarynda göz öňünde tutulan çäreleriň ýerine ýetirilişine berk gözegçilik etmegiň zerurdygyny belledi.
ORIENT news
