Aşgabat ÝHHG-niň howpsuzlygy pugtalandyrmakda we ynamy berkitmekde bitarap döwletleriň orny baradaky maslahatyna çagyrýar
Anna güni geçirilen Hökümet mejlisinde wise-premýer, Türkmenistanyň daşary syýasat edarasynyň ýolbaşçysy Raşid Meredow ýylyň birinji ýarymynda türkmen paýtagtynda ÝHHG-niň sebitinde howpsuzlygy pugtalandyrmakda we ynamy berkitmekde bitarap ýurtlaryň orny barada halkara maslahatyny geçirmek boýunça teklibi bilen çykyş etdi.
Hasabat döwründe, geçiriljek bu forumyň dowamynda, Bitaraplygyň türkmen nusgasynyň bütindünýäde parahatçylygy üpjün etmek, halkara howpsuzlygyny we durnukly ösüşi üpjün etmekdäki ähmiýetini açýan temalara şeýle hem, Türkmenistanyň Prezidenti tarapyndan başy başlanan “Ählumumy howpsuzlyk strategiýasynyň” düýp manysyny düşündirmäge ünsi çekmek meýilleşdirilýär.
Şunuň bilen birlikde, ara alyp maslahatlaşmalaryň dowamynda, halkara gapma-garşylyklaryny, çökgünlikleri we ýüze çykýan dürli ýagdaýlary çözmekde bitaraplyk gurallaryny we syýasy-diplomatik ýollaryň ulanylyşynyň aýratyn ähmiýetini ýene bir gezek tassyklamak göz öňünde tutulýar.
ÝHHG-na agza ýurtlaryň Hemişelik wekillerini “Ýewropada Howpsuzlyk we Hyzmatdaşlyk Guramasynyň sebitinde howpsuzlygy pugtalandyrmakda we ynamy güýçlendirmekde bitarap ýurtlaryň orny” atly halkara konferensiýa gatnaşmaga çagyrmak meýilleşdirilýär.
Ýewropada Howpsuzlyk we Hyzmatdaşlyk Guramasy bilen hyzmatdaşlygy pugtalandyrmak temasyny dowam etdiren Raşid Meredow, ÝHHG-nyň Baş sekretarynyň mart aýynda Türkmenistana saparyny guramagy hem teklip etdi.
Prezident Serdar Berdimuhamedow wise-premýer, Türkmenistanyň Daşary işler ministrine agzalan teklipleri ýokary derejede durmuşa geçirmegi tabşyrdy.
ORIENT news
