Kazanda ýaşaýan türkmenler Magtymgulynyň doglan gününiň 300 ýyllygy mynasybetli geçiriljek çärelere gatnaşarlar
Russiýa Federasiýasynyň Tatarystan Respublikasynda ýaşaýan türkmenler bu ýerde döredilen "Türkmenleriň Milli medeni awtonomiýasy" atly jemgyýetçilik guramasynyň üsti bilen Türkmenistanyň Kazan şäherindäki Baş konsullygy bilen bilelikde, hususanda, Magtymguly Pyragynyň doglan gününiň 300 ýyllygyna bagyşlap çäreleri geçirmäge taýýardyr.
Bu baradaky meýiller Türkmenistanyň Kazan şäherindäki baş konsuly Güýç Garaýew we ýokarda ady getirilen guramanyň ýolbaşçysy H.rozyýew bilen geçirilen gepleşiklerde mälim edildi. Diplomat türkmen-rus gatnaşyklarynyň pugtalandyrylýandygyna kanagatlanma bildirip, türkmen diasparosynyň wekillerini ata Watan Türkmenistanda geçirilýän çärelere gatnaşmaga çagyrdy.
Jemgyýetçilik guramasynyň wekilleri Dünýä türkmenleriniň ynsanperwer birleşiginiň, Türkmenistanyň daşary ýurtlardaky diplomatik wekilhanalarynyň we bu ýurtlarda ýaşaýan türkmenleriň arasynda ýakyn özara gatnaşyklaryň gurulýandygyny belläp, bu çakylygy hoşallyk bilen kabul etdiler. Şunda dünýä türkmenleriniň arasynda ýakyn gatnaşyklaryň ösdürilmeginde Türkmenistanyň Halk Maslahatynyň Başlygy Gurbanguly Berdimuhamedowyň aýratyn goşandy bellendi.
Taraplar şeýle hem, Kazan şäherindäki ýokary okuw mekdeplerinde Prezident Serdar Berdimuhamedowyň ýakynda çap edilen "Ýaşlar - Watanyň daýanjy" atly kitabynyň tanyşdyrylyş dabaralaryny guramagy ylalaşdylar. Söhbetdeşler watandaşlaryň arasynda özara gatnaşyklary mundan beýläk-de pugtalandyrmagyň möhümdigini bellediler.
ORIENT news
