Türkmenistanda guş iými üçin biologik işjeň goşunda patent aldylar
Türkmenistanyň Ylymlar akademiýasynyň Tehnologiýalar merkezinde guşlar üçin ekologiýa taýdan arassa biologiki goşundy patentleşdirildi. Guşlaryň öndürijiligini we kesellere durnuklylygyny ýokarlandyrýan bu iým goşundy energiýany öndürmek we aýawly ulanmak tehnologiýalary barlaghanasynda işlenip düzüldi.
Oýlap tapyş azyk maksatly ösdürilip ýetişdirilýän guşlar üçin niýetlenendir. Täze iým goşundysy guşlaryň hususanda, aşgazan-içege ulgamynyň keselleri bilen netijeli göreşmegine, öndürijiligi we dürli kesellere durnuklylygyny ýokarlandyrmaga ýardam edýär. Iým goşundysynyň düzüminde guşlaryň iýmitindäki ýiten aminokislotalaryň, witaminleriň we mikroelementleriň öwezini dolmaga, şeýle hem bedeniň mikroflorasyny kadalaşdyrmaga ýardam edýän bir öýjükli suwotular, zeolit, işjeňleşdirilen uglerod, gyzyl kaliforniýa gurçuklary bar.
“Gözlegleriň dowamynda goşundyny almak üçin dürli usullar synagdan geçirildi we olaryň netijelerine esaslanyp, ýerli tebigy maddalardan - guşlary ähli zerur maddalar bilen üpjün etjek ekologiýa taýdan arassa, ýokary hilli önümlerden, optimal deňagramly, mümkin bolan ýokary tehnologiýaly önüm alyndy” diýip, alymlar belleýärler.
Şeýle hem guşlaryň iýýän iýmitlerini aňsatlyk bilen siňdirmegine kömek edýän komponentlerden ybarat goşundyny öndürmegiň ykdysady taýdan bähbitlidigi bellendi. Gözlegleriň dowamynda alymlar zootehniki görkezijileriň ýokarlanandygyny we goşundynyň guşlara oňyn täsirini hasaba aldylar.
ORIENT news
