Gurbanguly Berdimuhamedow we Şawkat Mirziýoýew türkmen-özbek gatnaşyklaryny maslahatlaşdylar
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Özbegistan Respublikasynyň Prezidenti Şawkat Mirziýoýewiň arasynda telefon arkaly söhbetdeşlik boldy.
Söhbetdeşligiň başynda Halk Maslahatyň Başlygy we Özbegistanyň Prezidenti birek-biregi ýetip gelýän Täze ýyl bilen gutlap, iki ýurduň halklaryna parahatçylyk, bagtyýarlyk, abadançylyk, rowaçlyk arzuw etdiler. Pursatdan peýdalanyp, özbek Lideri Prezident Serdar Berdimuhamedowa mähirli salamyny we iň gowy arzuwlaryny beýan etdi.
Taraplar türkmen-özbek gatnaşyklaryny mundan beýläk-de ösdürmek, hoşniýetli goňşuçylyk we çuňňur strategiki hyzmatdaşlygyň häzirki meselelerini ara alyp maslahatlaşdylar. Özbegistanyň Prezidentiniň metbugat gullugynyň habar bermegine görä, hususanda, parlamentara dialogyň çäklerinde ozal gazanylan şertnamalary durmuşa geçirmegiň meselelerine garaldy.
Taraplar ileri tutulýan ähli ugurlarda özara bähbitli hyzmatdaşlygyň işjeňleşdirilýändigini çuňňur kanagatlanma bilen bellediler.
Özara söwdanyň mukdary ösýär - 2023-nji ýylyň ahyryna çenli söwda dolanyşygy 1 milliard dollardan geçer. Paýtagt şäherler Daşkentde we Aşgabatda iki ýurduň söwda öýleri açyldy hem-de häzirki wagtda Şawat-Daşoguz serhet zolagyny döretmek boýunça bilelikdäki işler alnyp barylýar.
Iki ýurduň öňdebaryjy kärhanalarynyň senagat, energetika, oba hojalygy we ulag pudagyndaky hyzmatdaşlygy ösdürilýär we sebitara gatnaşyklar barha giňedillýär. Şu ýyl bilelikdäki hökümetara toparynyň we Işewürlik geňeşiniň mejlisleir üstünlikli geçirildi.
Medeniýet günleri, döredijilik toparlarynyň gezelençleri ýaly medeni-ynsanperwer maksatnamanyň çäklerinde birnäçe çäreler geçirilýär.
Merkezi Aziýada sebit hyzmatdaşlygyny ösdürmegiň möhüm ugurlary barada hem pikir alşyldy. 2024-nji ýylda geçiriljek duşuşyklaryň gün tertibine hem garaldy.
ORIENT news
