Türkmenistanyň futbol ýygyndysy BAE-de nobatdaky duşuşygyny geçirdi
8-nji oktýabrdan bäri Birleşen Arap Emirliklerinde okuw-türgenleşik ýygnanyşygynda bolýan futbol boýunça Türkmenistanyň milli ýygyndysy bu ýerde nobatdaky ýoldaşlyk duşuşygyny geçirdi.
BAE-niň häzirki çempiony “Şabab Al-Ahli” toparynyň garşysyna geçirilen duşuşyk 4:1 hasabynda ýer eýeleriniň peýdasyna tamamlandy. Türkmen toparyndaky ýeke-täk pökgini 11 metrlik urguda Myrat Annaýew tora saldy.
Ozal birinji diwizionda oýnaýan “Dubaý Ýunaýted” topary bilen geçirilen duşuşyk hem 3:1 hasabynda tamamlanypdy. Mergen Orazowyň tälim berýän milli topary 18-nji oktýabrda Emirlikleriň “Ajman” topary bilen jemleýji duşuşygyny geçirer we Türkmenistana dolanar.
“Dünýä çempionaty – 2026” oýunlarynyň saýlama tapgyrynda “E” toparçada çykyş edýän Türkmenistanyň milli futbol ýygyndysynyň garşydaşlary Eýranyň, Özbegistanyň toparlary we Gonkong – Butan duşuşygynyň ýeňijisi bolar.
Eýýäm 16-njy noýabrda Türkmenistan 2026-njy ýylyň futbol boýunça dünýä çempionatynyň saýlama tapgyrynyň ikinji aýlawyna başlap, öz ýerinde Özbegistanyň ýygyndysyny kabul eder.
ORIENT news
