Türkmen türgeni dünýä çempionatynda saýlama ýaryşyna girdi
Türkmen ýeňil atletikaçysy Alişer Sadullaýew şu gün, 19-njy awgustda Budapeştde (Wengriýa) başlanan dünýä çempionatynyň 100 metr aralygynda deslapky ýaryşlara gatnaşdy.
Iň oňat netijeleri görkezen türgenler birinji tapgyra awtomatiki girdiler. Bu ululykdaky ýaryşda ilkinji gezek öz ýurduna wekilçilik eden türkmen ýeňil atletikaçy 10,90 sekunt netije bilen onunjy boldy. Derejäni bolsa, 10,24 sekunt netije bilen Malaýziýaly Muhd Azim Fahmi gazandy.
Jemi dört sany saýlama ýaryşy geçirildi - hersinden iki türgen indiki tapgyra çykdy. Ýene iki gatnaşyjy ýeňilenleriň arasynda iň gowy wagt bilen kesgitlendiler.
— Men dünýä derejesindäki ýaryşlara ilkinji gezek gatnaşýaryn we bu abraýly ýaryşa gatnaşmak karýeramyma güýçli itergi berer, şahsy höweslendirme bolar diýip umyt edýärin, - diýip Alişer Sadullaýew ORIENT-iň habarçysyna aýtdy.
Çempionata 200-den gowrak ýurtdan 2000-den gowrak türgen gatnaşýar. Ýaryş üçin ýörite gurlan meýdança - Milli ýeňil atletika merkezine 36 000 tomaşaçy ýerleşip biler. Marafon ylgawy we sport ýörişleri üçin awtoulag ýollary Budapeştiň merkezinde ýerleşýär.
— Bu ýerde gören infrastrukturam gaty gowy, meni täsin galdyrdy! Çempionatyň guramaçylygy bilen bir hatarda ol hem ýokary derejede,- diýip Sadullaýew nygtady.
Ýeňil atletika boýunça dünýä çempionatynyň maksatnamasyna 35 km aralyga sport ýörişleri, 4x400 m garyşyk estafeta, disk zyňmak, uzaklyga bökmek, naýza zyňmak, çekiç zyňmak, ýadro atmak, päsgelçilikli ylgamak we ş.m. girýär.
ORIENT news
