“Gazprom” “Geljegiň oýunlary” (Igry buduşşego) atly ilkinji halkara ýaryşynyň baş hemaýatkäri bolar
Russiýa Federasiýasynyň Wise-premýeriniň orunbasary Dmitriý Çernyşenko penşenbe güni Sankt-Peterburgyň Lahta merkezinde “Gazprom” PJ-niň Dolandyryş geňeşiniň başlygy Alekseý Miller bilen duşuşdy.
Taraplar jemgyýetçilik ähmiýetli taslamalary - haýyr-sahawat, medeni, sport taslamalaryny durmuşa geçirmekde kompaniýanyň goşandyny ara alyp maslahatlaşdylar.
“Gazprom” PJ-niň köp ýyl bäri Russiýada sport hereketiniň ösüşine yzygiderli gatnaşýandygy, hünär sportunyň ösmegine işjeň ýardam berýändigi, milli sport federasiýalaryna goldaw berýändigi, ýokary derejeli ýaryşlary geçirmäge kömek edýändigi barada hem bellenip geçildi.
Duşuşygyň barşynda Alekseý Miller bilen Dmitriý Çernyşenkonyň gatnaşmagynda resminamalara gol çekildi, şoňa laýyklykda “Gazprom” “Geljegiň oýunlary” (Igry buduşşego) atly ilkinji halkara multisport ýaryşynyň baş hemaýatkäri bolup, bedenterbiýäniň we kibersportuň birleşmeginde taryhda ilkinji oýunlary geçirmäge ýakyndan ýardam berer. Bäsleşik 2024-nji ýylda Kazanda geçiriler.
Ýaryş sanly tehnologiýalary we bedenterbiýe işjeňligini birleşdirýän innowasion sportuň ösmegine we olaryň adaty sport bilen sazlaşmagyna goldaw bermegi maksat edinýär.
Bäsleşikler 16 gibrid ders boýunça geçiriler. Olaryň her biri "fijital" (physical+digital) düşünjesini öz içine alýar, ýagny bedenterbiýäni we kibersporty ýa-da wirtual we giňeldilen hakykat tehnologiýalaryny birleşdirýär. Bäsleşige 100 ýurtdan toparlaryň we türgenleriň gatnaşmagyna garaşylýar.
ORIENT news
